₹2,000ಕ್ಕಿಂತ ಹೆಚ್ಚಿನ UPI ವಹಿವಾಟಿನ MDR ನೀತಿ ಮರುಪರಿಶೀಲಿಸಿ: ಭೋಗೇಶ್ ಸೋಲಾಪುರ

ವಿಜಯಪುರ ಸೇ 17: UPI ಮೂಲಕ ನಡೆಯುವ ಅರ್ಹ ವ್ಯಾಪಾರಿ ವಹಿವಾಟುಗಳಿಗೆ MDR ವಿಧಿಸುವ ವ್ಯವಸ್ಥೆಯನ್ನು ಕೇಂದ್ರ ಸರ್ಕಾರ ಮರುಪರಿಶೀಲಿಸಬೇಕು ಎಂದು ಆಮ್ ಆದ್ಮಿ ಪಾರ್ಟಿ ವಿಜಯಪುರ ಜಿಲ್ಲಾಧ್ಯಕ್ಷರು ಹಾಗೂ ರಾಷ್ಟ್ರೀಯ ಮಂಡಳಿ ಸದಸ್ಯರಾದ ಭೋಗೇಶ್ ಸೋಲಾಪುರ ಆಗ್ರಹಿಸಿದ್ದಾರೆ. UPI ದೇಶದ ಡಿಜಿಟಲ್ ಪಾವತಿ ವ್ಯವಸ್ಥೆಯ ಪ್ರಮುಖ ಭಾಗವಾಗಿದ್ದು, NPCI ಅಂಕಿಅಂಶಗಳ ಪ್ರಕಾರ ಆಗಸ್ಟ್ 2026ರಲ್ಲಿ UPI ಮೂಲಕ 24,508.96 ಮಿಲಿಯನ್ ವಹಿವಾಟುಗಳು ನಡೆದಿದ್ದು, ಅವುಗಳ ಒಟ್ಟು ಮೌಲ್ಯ ₹29,82,355.95 ಕೋಟಿಯಾಗಿದೆ ಎಂದು ಅವರು ತಿಳಿಸಿದ್ದಾರೆ. ಜನರನ್ನು ಡಿಜಿಟಲ್ ಹಾಗೂ ನಗದುರಹಿತ ವ್ಯವಹಾರಗಳತ್ತ ಉತ್ತೇಜಿಸಿದ ಬಳಿಕ UPI ಬಳಕೆಗೆ ಸಂಬಂಧಿಸಿದಂತೆ ಹೆಚ್ಚುವರಿ ಶುಲ್ಕದ ವ್ಯವಸ್ಥೆ ಏಕೆ ಅಗತ್ಯವಾಗಿದೆ ಎಂಬುದನ್ನು ಕೇಂದ್ರ ಸರ್ಕಾರ ಸ್ಪಷ್ಟಪಡಿಸಬೇಕು ಎಂದು ಸೋಲಾಪುರ ಪ್ರಶ್ನಿಸಿದ್ದಾರೆ. MDRನ ಅಂತಿಮ ಹೊರೆ ವ್ಯಾಪಾರಿಗಳ ಮೇಲೆಯೇ ಉಳಿಯುತ್ತದೆಯೇ ಅಥವಾ ವ್ಯಾಪಾರಿಗಳ ವೆಚ್ಚ ಹೆಚ್ಚಾದರೆ ವಸ್ತು ಮತ್ತು ಸೇವೆಗಳ ಬೆಲೆಗಳ ಮೂಲಕ ಅದರ ಪರಿಣಾಮ ಗ್ರಾಹಕರ ಮೇಲೂ ಬೀಳಬಹುದೇ ಎಂಬುದರ ಕುರಿತು ಸರ್ಕಾರ ಸ್ಪಷ್ಟತೆ ನೀಡಬೇಕು ಎಂದು ಅವರು ಹೇಳಿದ್ದಾರೆ. ಸಣ್ಣ ಅಂಗಡಿಕಾರರು, ಬೀದಿ ವ್ಯಾಪಾರಿಗಳು ಹಾಗೂ ಸಣ್ಣ ಉದ್ಯಮಿಗಳ ಮೇಲೆ ಯಾವುದೇ ಹೆಚ್ಚುವರಿ ಆರ್ಥಿಕ ಒತ್ತಡ ಉಂಟಾಗದಂತೆ ರಕ್ಷಣಾತ್ಮಕ ನಿಯಮಗಳನ್ನು ರೂಪಿಸಬೇಕು ಎಂದು ಅವರು ಒತ್ತಾಯಿಸಿದ್ದಾರೆ. ಅದೇ ರೀತಿ UPI ವ್ಯವಸ್ಥೆಯ ನಿರ್ವಹಣೆ, ತಾಂತ್ರಿಕ ಮೂಲಸೌಕರ್ಯ ಮತ್ತು ಸೈಬರ್ ಭದ್ರತೆಗೆ ವಾರ್ಷಿಕವಾಗಿ ಎಷ್ಟು ವೆಚ್ಚವಾಗುತ್ತದೆ, ಸರ್ಕಾರದಿಂದ ಎಷ್ಟು ಹಣಕಾಸು ನೆರವು ನೀಡಲಾಗುತ್ತಿದೆ ಹಾಗೂ MDR ಮೂಲಕ ಎಷ್ಟು ಹಣ ಸಂಗ್ರಹವಾಗಲಿದೆ ಎಂಬ ಮಾಹಿತಿಯನ್ನು ಸಾರ್ವಜನಿಕಗೊಳಿಸಬೇಕು ಎಂದು ಸೋಲಾಪುರ ಆಗ್ರಹಿಸಿದ್ದಾರೆ. ಆಮ್ ಆದ್ಮಿ ಪಾರ್ಟಿಯ ಪ್ರಮುಖ ಆಗ್ರಹಗಳು 1. ₹2,000ಕ್ಕಿಂತ ಹೆಚ್ಚಿನ ಅರ್ಹ P2M UPI ವಹಿವಾಟುಗಳ ಮೇಲಿನ MDR ವ್ಯವಸ್ಥೆಯನ್ನು ಮರುಪರಿಶೀಲಿಸಬೇಕು. 2. MDRನ ಪರಿಣಾಮ ಗ್ರಾಹಕರಿಗೆ ಪರೋಕ್ಷ ಹೆಚ್ಚುವರಿ ಹೊರೆ ಆಗದಂತೆ ಸ್ಪಷ್ಟ ನಿಯಮ ರೂಪಿಸಬೇಕು. 3. MDR ದರ, ಮಿತಿ ಹಾಗೂ ಅನ್ವಯವಾಗುವ ವಹಿವಾಟುಗಳ ವಿವರಗಳನ್ನು ಸರಳವಾಗಿ ಪ್ರಕಟಿಸಬೇಕು. 4. UPI ವ್ಯವಸ್ಥೆಯ ನಿರ್ವಹಣೆ ಮತ್ತು ತಾಂತ್ರಿಕ ವೆಚ್ಚಗಳ ಬಗ್ಗೆ ಪಾರದರ್ಶಕ ಮಾಹಿತಿ ನೀಡಬೇಕು. 5. ಸಣ್ಣ ವ್ಯಾಪಾರಿಗಳು ಹಾಗೂ ಬೀದಿ ವ್ಯಾಪಾರಿಗಳಿಗೆ ಹೆಚ್ಚುವರಿ ಹೊರೆ ಬೀಳದಂತೆ ರಕ್ಷಣೆ ನೀಡಬೇಕು. 6. UPIಯ ಸರಳ, ವೇಗದ ಮತ್ತು ವ್ಯಾಪಕ ಡಿಜಿಟಲ್ ಪಾವತಿ ವ್ಯವಸ್ಥೆಯ ಸ್ವರೂಪಕ್ಕೆ ಧಕ್ಕೆಯಾಗದಂತೆ ನೀತಿ ರೂಪಿಸಬೇಕು. UPI ಭಾರತದ ಡಿಜಿಟಲ್ ಆರ್ಥಿಕತೆಯ ಪ್ರಮುಖ ಮೂಲಸೌಕರ್ಯವಾಗಿರುವ ಹಿನ್ನೆಲೆಯಲ್ಲಿ, ಅದರ ಆರ್ಥಿಕ ಸುಸ್ಥಿರತೆಗೆ ಪರ್ಯಾಯ ಹಣಕಾಸು ಮಾದರಿಗಳ ಕುರಿತು ಸಾರ್ವಜನಿಕ ಚರ್ಚೆ ನಡೆಸಬೇಕು. UPI ಶುಲ್ಕದ ಪರಿಣಾಮ, MDRನ ಅನ್ವಯ ಮತ್ತು ಅದರ ಅಂತಿಮ ಹೊರೆ ಯಾರ ಮೇಲೆ ಬೀಳಲಿದೆ ಎಂಬುದರ ಕುರಿತು ಕೇಂದ್ರ ಸರ್ಕಾರ ಜನರಿಗೆ ಸ್ಪಷ್ಟ ಉತ್ತರ ನೀಡಬೇಕು ಎಂದು ಭೋಗೇಶ್ ಸೋಲಾಪುರ ಒತ್ತಾಯಿಸಿದ್ದಾರೆ.